Talleres de Boxeo funcional e movemento do FSG Lugo [editar]

O programa de Promoción da Saúde na Comunidade Xitana en Lugo impulsa dous talleres de “Boxeo funcional, enerxía, saúde e movemento”

Persoas participantes do programa de Promoción da Saúde na Comunidade Xitana asistiron a un taller de “Boxeo funcional, enerxía, saúde e movemento”, unha actividade orientada a promover a actividade física e o benestar integral a través do exercicio dinámico.

Este taller enmárcase dentro das accións dirixidas a fomentar hábitos de vida saudables, combinando exercicio físico, coordinación e desenvolvemento persoal. A sesión ofreceu ás persoas participantes a oportunidade de iniciarse no boxeo funcional como ferramenta para mellorar a súa condición física e o seu estado emocional.

Entre os principais obxectivos da actividade atópanse o fomento da condición física xeral, así como o aumento da coordinación, a axilidade e os reflexos mediante a realización de movementos dinámicos e controlados. Así mesmo, o taller serviu como unha vía eficaz para liberar o estrés e mellorar o estado de ánimo, grazas ao carácter activo e intenso da práctica deportiva.

Outro dos aspectos traballados foi o fortalecemento da disciplina, a concentración e a confianza persoal, elementos clave non só na práctica deportiva, senón tamén na vida cotiá. Ademais, púxose especial énfase na mellora da postura e do equilibrio, a través de desprazamentos e técnicas específicas adaptadas ao nivel das persoas participantes.

A actividade desenvolveuse cunha metodoloxía participativa e accesible, adaptada ás capacidades do grupo, favorecendo un ambiente motivador e de apoio que facilitou a implicación activa das persoas asistentes. Dada a demanda dos participantes, fixéronse dúas convocatorias.

Con este tipo de iniciativas, o programa de Promoción da Saúde na Comunidade Xitana continúa apostando pola mellora da saúde e da calidade de vida, promovendo hábitos activos e reforzando o benestar físico, emocional e social da comunidade.

Programa de interese xeral con fins de carácter sociosanitario e cofinanciado pola Unión Europea no marco do Programa FSE+ Galicia 2021-2027, para realizar programas de saúde pública, no eido da promoción da saúde da poboación xitana, por entidades privadas sen ánimo de lucro que desenvolven o seu labor na Comunidade Autónoma de Galicia para os anos 2024 a 2027.