Unha edición do Formatéate con Garantía 2026 en Pontevedra chea de éxitos [editar]
As persoas participantes do Formatéate con Garantía de Pontevedra rematan unha etapa marcada pola aprendizaxe, o esforzo e novas oportunidades laborais.
Tras tres meses de formación en Venda e Preparación de Pedidos, dende marzo ata xuño, o balance da edición 2026 é moi positivo. Varias persoas participantes recibiron oportunidades de contratación ao rematar as prácticas e catro delas xa se atopan traballando na actualidade.
O Formatéate con Garantía 2026 en Pontevedra, desenvolvido no marco do (26) Programa Aprender Traballando e Formatéate FSE Plus Emprego Xuvenil Pontevedra, chegou ao seu fin o pasado mes de xuño deixando tras de si moito máis que 300 horas de formación. Durante tres meses, as persoas participantes tiveron a oportunidade de desenvolver competencias persoais, dixitais e profesionais fundamentais para mellorar a súa empregabilidade e avanzar no seu proxecto vital e laboral.
O itinerario comezou co módulo “Coñécete”, onde, da man da súa docente Alicia, traballaron aspectos como a motivación, o autocoñecemento, a autoestima e a confianza persoal, claves para afrontar novos retos e construír un proxecto profesional sólido.
Na fase “Actívate”, reforzaron competencias básicas e dixitais, hoxe imprescindibles para acceder e manterse nun mercado laboral cada vez máis tecnolóxico, dinámico e esixente.
Posteriormente, a través dos módulos “Fórmate” e “Empléate”, adquiriron coñecementos específicos na especialidade de Venda e Preparación de Pedidos e tiveron a oportunidade de poñelos en práctica en empresas colaboradoras. Precisamente nesta edición queremos destacar e agradecer o compromiso destas empresas, que abriron as súas portas ao alumnado e contribuíron de maneira decisiva ao seu proceso de aprendizaxe. Grazas a esta colaboración, un número moi significativo das persoas mozas que realizaron as prácticas recibiron expectativas reais de contratación futura. Ademais, catro delas xa están incorporadas ao mercado laboral.
A clausura estivo cargada de emoción. A súa titora quixo homenaxear o grupo cun pequeno vídeo que recollía os mellores momentos desta experiencia compartida. Un recordo que reflicte que o verdadeiro logro non foi unicamente acadar unha primeira experiencia laboral, senón tamén superar medos, descubrir capacidades, gañar confianza, crear vínculos e demostrar que son capaces de alcanzar metas que meses atrás parecían moi afastadas.
Para moitas destas mozas e mozos, completar con éxito a fase de prácticas e chegar ao final do programa supuxo un dos maiores logros persoais dos últimos anos. A perseveranza, o esforzo e a capacidade de superación demostradas ao longo destes meses son, sen dúbida, unha das mellores aprendizaxes deste camiño.
A edición 2026 deixa unha mensaxe clara: cando se ofrecen oportunidades e as persoas cren nas súas capacidades, o futuro convértese nunha realidade chea de posibilidades. Porque o éxito non se mide só polos contratos conseguidos, senón tamén polo crecemento persoal, a confianza recuperada e todo o aprendido durante o camiño.
Esta acción formativa está financiada pola Unión Europea a través do Fondo Social Europeo Plus (FSE+), polo Ministerio de Dereitos Sociais, Consumo e Axenda 2030, polo Ministerio de Traballo e Economía Social e por Fundación “la Caixa” no marco do Programa Acceder.
