Os fogóns toman o Programa CALÍ nun obradoiro de cociña saudable [editar]

O Programa CALÍ e ACAIS – En familia todas e todos contan [Programa de Prevención Universal] desenvolveron unha sesión de cociña saudable na que as participantes elaboraron diferentes receitas como hummus, paté de pemento, pan de brócoli e cenoria, zumes naturais e bombóns de dátiles. A actividade permitiu adquirir coñecementos prácticos sobre alimentación saudable nun ambiente participativo e dinámico.

O pasado venres, as participantes do Programa CALÍ participaron nun obradoiro de cociña saudable organizado en colaboración con ACAIS – En familia todas e todos contan [Programa de Prevención Universal], unha actividade orientada á promoción de hábitos de vida saudables e ao desenvolvemento de competencias prácticas relacionadas coa alimentación.

Durante a sesión, as asistentes tiveron a oportunidade de elaborar diferentes receitas saudables, sinxelas e adaptables ao día a día familiar. Entre as preparacións realizadas atopábanse paté de pemento, hummus caseiro, zumes naturais de diferentes froitas, pan de brócoli e cenoria e bombóns de dátiles con cobertura de chocolate.

A través desta experiencia, as participantes descubriron novas formas de incorporar alimentos nutritivos á súa alimentación, aprendendo alternativas creativas para facer máis atractivos determinados ingredientes e favorecendo a adquisición de hábitos saudables que poderán trasladar aos seus fogares.

Ademais dos coñecementos culinarios adquiridos, a actividade fomentou a participación activa, o traballo en equipo e o intercambio de experiencias entre as asistentes, xerando un espazo de aprendizaxe dinámico e enriquecedor.